Традиционалната празнична прослава на Коледе во Лерин (Флорина) беше нарушена од политички интервенции, откако градоначалникот Василеос Гианакис забрани пеење на македонски јазик.
Инцидентот се случил за време на настапот на музичкиот бенд „Ендопика“. Музичарите, кои се подготвувале да ја изведат македонската народна песна „Софка на татко“, добиле јасно упатство од градските власти:
- Забрането е пеење на македонски јазик.
- Песната смее да се изведе исклучиво инструментално.
Оваа одлука го претвори културниот настан во демонстрација на моќ и цензура врз македонското малцинство.
За активистот за правата на Македонците во Грција, Павле Васкопулос, овој чин не е изненадување. Тој истакнува дека ваквите случаи на притисок и дискриминација не се новост за Македонците во Леринско, Костурско и Воденско. „Граѓаните кои јавно зборуваат за своите права и јазик често се етикетирани како ’скопски агенти’ и се соочуваат со стигматизација“, предупредува Васкопулос.
Обидите на медиумите, вклучително ТВ 24, да добијат официјален став од Општина Лерин за потегот на градоначалникот, засега остануваат без одговор. Локалните власти не коментираат зошто една песна предизвикува толкав страв и забрана во 21-от век.
