Иако поминаа неколку години откако официјално се повлече од професионалниот тенис, Роџер Федерер докажува дека неговата врска со белиот спорт е нераскинлива. Швајцарскиот маестро пристигна во Мелбурн на Австралија Опен 2026, каде веднаш стана главна атракција.
Федерер не е во Мелбурн само како гостин во ложата. Тој е дел од неколку промотивни настани, но она што најмногу ги возбуди навивачите е најавата дека Роџер повторно ќе земе рекет во раце. Оваа сабота, на 17 јануари, Федерер ќе истрча на „Род Лејвер Арената“ како дел од специјален настан кој ветува многу емоции и потсетување на неговите најславни денови.
„Сакам да останам блиску до тенисот. Овој свет ми даде сè и посетата на големите турнири е мојот начин да останам поврзан со фановите и играта“, изјави кратко Федерер по пристигнувањето.
Шесткратниот шампион на Австралија Опен секогаш имал посебен однос со австралиската публика. Неговото присуство во воведната недела на турнирот додава посебен сјај на овогодинешното издание, а влезниците за саботниот настан веќе се распродадени до последното место.
